Marathi Kavita
कवितेचा उत्सव
☆ खरा पाऊस… ☆ श्री शरद कुलकर्णी ☆
व्हावे मनाचे आकाश,
यावे काळजांत मेघ.
दूर क्षितिज दिसावे,
जशी काल्पनिक रेघ.
मोर मनस्वी नाचावे,
पावसात लयबद्ध .
असो पाऊस उत्सव,
पापण्यात खोल बद्ध.
कधी ओलेचिंब व्हावे,
थेंब सुजाण जपावा.
पावसाळ्याच्या ऋतुत,
खरा पाऊस कळावा.
© श्री शरद कुलकर्णी
मिरज
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कविराज विजय यशवंत सातपुते
कवितेचा उत्सव # 133 – विजय साहित्य
☆ गुरुपौर्णिमा…! ☆ कविराज विजय यशवंत सातपुते ☆
ज्ञानार्जन, ज्ञानदान
नित्य हवे देणे घेणे
शिकविते चराचर
ज्ञान सृजनाचे लेणे. . . . !
गुरू रूप ईश्वराचे
जगण्याचा मार्ग देते.
कृपा प्रसादे करून
सन्मार्गाच्या पथी येते. . . . . !
गुरू ईश्वरी संकेत
संस्काराची जपमाळ
शिकविते जिंकायला
संकटांचा वेळ, काळ. . . . . !
चंद्र प्रकाशात जसे
तेज चांदणीला येते
पौर्णिमेत आषाढीच्या
व्यास रूप साकारते.. . . !
माणसाने माणसाला
घ्यावे जरा समजून
ऋण मानू त्या दात्यांचे
गुरू पुजन करून. . . . !
संस्काराचा ज्ञानवसा
एक हात देणार्‍याचा
पिढ्या पिढ्या चालू आहे
एक हात घेणार्‍याचा.
असे ज्ञानाचे सृजन
अनुभवी धडे देते
जीवनाच्या परीक्षेत
जगायला शिकविते. . . !
ज्ञानियांचा ज्ञानराजा
व्यासाचेच नाम घेई.
महाकाव्ये , वेद गाथा
ग्रंथगुरू ज्ञान देई. . . . !
© कविराज विजय यशवंत सातपुते
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
चित्रकाव्य
– संत सोयराबाई – ☆ सुश्री नीलांबरी शिर्के ☆
☆
संत चोखा सहचर
संत बंका होता दीर
संत सोयराच्या घरी
विठ्ठल नामाचा गजर—
☆
चोखामेळ्याच्या कुटुंबी
पंढरीची नित्य वारी
विठ्ठल भरून उरला
मनमंदिरा गाभारी—
☆
विठूमाऊली भक्तीचा
वारसाच सासरचा
प्रथम दलित कवयित्री
मान आहे सोयराचा—
☆
समाजाला लागलेली
अंधश्रद्धेची खोल कीड
सोयराबाईस होती त्याची
मना आतूनच चीड—
☆
जातीभेद शिवाशीव
नको नको आचरणी
कर्मकांड यज्ञयाग
सोयरा सांगते भजनी—
☆
चराचरात विठ्ठल
नाही फक्त गाभाऱ्यात
ओतप्रोत भक्तीतून
आणि व्यक्त आचरणात—
☆
याच विषयाच्या केल्या
असंख्य अभंग रचना
अशा सोयराबाईला
मिळे भक्तिरस पान्हा—
☆
(देहीचा विटाळ म्हणती सकळ आत्मा तो निर्मळ म्हणती सर्व देहीचा विटाळ देहात जन्मला सोहळा तो झाला कवणाले – संत सोयराबाई)
या ताकदीने त्या काळात लिहिणारी संत सोयराबाई
© सुश्री नीलांबरी शिर्के
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सौ. जयश्री पाटील
अल्प परिचय
नाव- सौ.जयश्री अनिल पाटील.
शिक्षण – बी. कॉम.
प्रकाशन – कविता संग्रह व बाल कविता संग्रह प्रकाशनाच्या वाटेवर.
सन्मान एवं पुरस्कार –
सम्प्रति – अनेक मासिकं किशोर ,जीवन शिक्षण, शिक्षण संक्रमण, जन स्वास्थ्य, संवेदना इत्यादी मधून कविता व लेख प्रसिद्ध. दिवाळी अंकांतून लेख व कविता प्रकाशित. सकाळ सप्तरंग, पुढारी बहार मधून कविता प्रसिद्ध. आकाशवाणी वरून काव्यवाचन कार्यक्रम.
अनेक ठिकाणी काव्यवाचन तसेच कार्यक्रमामध्ये प्रमुख पाहुण्या म्हणून उपस्थिती .अनेक सामाजिक कार्यक्रमामध्ये सहभाग.महिला मंडळ व भजनी मंडळ अध्यक्षा. बॅडमिंटन व रींग टेनिस चॅम्पियन.
कवितेच्या उत्सव
☆ सावळ्या रे… ☆ सौ. जयश्री पाटील ☆
तुझ्या दर्शनासी देवा
पंढरीच्या रे विठ्ठला
भेटीसाठी सावळ्या रे
जीव माझा आतुरला….१
धाव घेईल मन माझे
जीव होई कासावीस
कृपा करी भगवंता
मना तुझीच रे आस….२
मुखी तुझे नाम गोड
नित्य तुझाच रे ध्यास
दंग तुझ्या कीर्तनात
वाटे रहावे रात्रंदिस….३
तान्हे बाळ आईसाठी
टाहो फोडे वारंवार
तुझ्या कुशीत विसावा
मिळावा रे क्षणभर….४
रूप तुझे पाहूनीया
तृप्त होते माझे मन
तुझ्या भक्तीसाठी देवा
जन्म जावा हा संपून….५
© सौ. जयश्री पाटील
विजयनगर.सांगली.
मो.नं.:-8275592044
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री सुजित कदम
कवितेचा उत्सव
☆ सुजित साहित्य # 117 – दत्तगुरु…! ☆
हा प्रत्येक श्वास माझा दत्तात्रेय गात आहे
दर्शनास गुरुदत्ता आतुरला जिव आहे…१
हे श्री गुरु दत्तात्रेया तू आहे चराचरात
भक्तास तारावयाला तू येतो कसा क्षणात …२
घेतसे मिटून डोळे मी तुझ्या दर्शनासाठी
चरणी ठेवतो माथा तुलाच पाहण्यासाठी…३
हे श्री गुरु दत्तात्रेया दे दर्शन तू मजला
गाणगापूरी आलो मी दत्ता तुला भेटण्याला..४
दिगंबरा दिगंबरा जयघोष होत आहे
तू दर्शन देता देवा आनंदला जिव आहे…५
दत्तात्रेया कृपा तुझी जन्माचे सार्थक झाले
जाहले दर्शन आणि आयुष्याचे सोने झाले…६
ह्या देहास माझ्या आता सेवा तुझीच घडावी
चरणावरीच तुझिया प्राण ज्योत ही विझावी..७
© सुजित कदम
संपर्क – 117, विठ्ठलवाडी जकात नाका, सिंहगढ़ रोड,पुणे 30
मो. 7276282626
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री नीलांबरी शिर्के
चित्रकाव्य
– संत जनाबाई – ☆ सुश्री नीलांबरी शिर्के ☆
☆
संत जनाबाई
तिची सावळी विठाई
तिचा नव्हता तो देव
तिला वाटे तो मानव—-
☆
जनाबाई संगे
विठू गोवऱ्या थापतो
आणि तिच्यासंगे
तो धुणेही धुवतो —–
☆
जनाबाईकडे देव
तिला भेटायला गेला
तिची वाकळ पांघरे
तिथे विसरला शेला—–
☆
जनी संगे देव
दळता दळण
चंद्रहार खुंटीवर
आला विसरून—-
☆
जनीला भेटायला
जाई गोपाळपूराला
बडवे धुंडाळती इथे
गाभारी त्या हरीला—-
☆
अशी जनाबाई
असा पांडुरंग
वेगळीच भक्ती
वेगळाच रंग—-
☆
© सुश्री नीलांबरी शिर्के
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
कै. इंदिरा संत (इंदिरा दीक्षित)
कवितेच्या उत्सव
☆ मरवा ☆ कै. इंदिरा संत (इंदिरा दीक्षित) ☆
पुस्तकातली खूण कराया,
दिले एकदा पिस पांढरे,
पिसाहुनी सुकुमार काहीसे,
देता घेता त्यात थरारे.
मेजावरचे वजन छानसे,
म्हणून दिला नाजूक शिंपला,
देता घेता उमटे काही,
मीना तयाचा त्यावर जरला.
असेच काही द्यावे घ्यावे,
दिला एकदा ताजा मरवा,
देता घेता त्यात मिसळला,
गंध मनातील त्याहून हिरवा.
– इंदिरा संत
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
श्री अमोल अनंत केळकर
कवितेच्या उत्सव
☆ वारी… ☆ श्री अमोल अनंत केळकर☆
रखुमाई म्हणाली विठ्ठलाला,
काय, यंदाची वारी
काय, हे जमलेले भक्त
काय, ह्यो तुझा थाट
ओक्के मधे सगळं …
दोन वर्षांनी यंदा आषाढीला
वाटलं सगळं आपलं
पांडुरंग म्हणाला रखुमाईला,
कसली ती महामारी
कसला तो लाॅकडाऊन
वाईट वाटत होतं दोन वर्ष
‘भक्तांची’ अवस्था पाहून
दुष्टचक्र संपले ,
वैष्णव सारे जमले
‘भेटी लागे जीवा’ म्हणत
पालख्या, रिंगण सजले
येताना होतोच सोबत
आपणही बनून वारकरी
‘थकलेल्या माऊलींसाठी
चल, सोबत नेऊ पंढरी ‘
© श्री अमोल अनंत केळकर
बेलापूर, नवी मुंबई, मो ९८१९८३०७७९
poetrymazi.blogspot.in, kelkaramol.blogspot.com
कवितेच्या उत्सव
☆ आत आसवे गाळत गेलो ☆ श्री निशिकांत देशपांडे ☆
ध्यानी आले, आयुष्याची
पाने जेंव्हा चाळत गेलो
हास्य लिंपुनी तोंडावरती
आत आसवे गाळत गेलो
सातत्त्याने करीत अभिनय
माझ्यापासून मीच हरवलो
टाळ्या, शिट्ट्या मिळवायाला
पात्र मस्त मी वठवत बसलो
नाटक सरता भयाण वास्तव,
आरशास मी टाळ्त गेलो
हास्य लिंपुनी तोंडावरती
आत आसवे गाळत गेलो
गर्दीमध्ये, तरी एकटे
सूत्र जाहले जगावयाचे
जिथे निघाला जमाव सारा
त्याच दिशेने निघावयाचे
पुरून आशा-आकांक्षांना
प्रवाहात मी मिसळत होतो
हास्य लिंपुनी तोंडावरती
आत आसवे गाळत गेलो
वसंत आला म्हणे कैकदा
पुढे सरकला मला टाळुनी
ग्रिष्माच्या मी झळा भोगतो
बिना सावली, उभा राहुनी
पर्णफुटीची आस संपता
कणाकणाने वाळत गेलो
हास्य लिंपुनी तोंडावरती
आत आसवे गाळत गेलो
मनासारखे जगू न शकणे
माणसास हा शाप लाभला
परीघ रूढीपरंपरांचा
गळ्याभोवती घट्ट काचला
हताश होउन सिगारेटच्या
धुरात स्वप्ने जाळत गेलो
हास्य लिंपुनी तोंडावरती
आत आसवे गाळत गेलो
साथ सखीची जीवनातली
हीच काय ती होती हिरवळ
एक फुलाचा पुरे जाहला
धुंद व्हावया सदैव दरवळ
दु:खाच्या ओझ्याखालीही
सखीसवे हिंदोळत गेलो
हास्य लिंपुनी तोंडावरती
आत आसवे गाळत गेलो
© श्री निशिकांत देशपांडे
पुणे
मो.क्र.९८९०७ ९९०२३
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
सुश्री प्रभा सोनवणे
कवितेच्या प्रदेशात # 141
☆ सांज… ☆ सुश्री प्रभा सोनवणे ☆
सांज अशी सजलेली
पसरली स्वर्ण लाली
क्षितिजावर आतुरतेने
शब्दांचे मंजुळ पक्षी!
सांज अशी नटलेली
जणू शेला पांघरलेली
शब्दांचा लेवून साज
अवतरली कोण नीलाक्षी?
सांज अशी मंतरलेली
शब्दकळाच अंथरलेली
प्रतिभेच्या रुजाम्यावरची
अतिसुबक साजिरी नक्षी!
सांज अशी मोहरलेली
मोहरलेली घेवून रंग गुलाबी
शब्दांचे मेघ बरसले
अन तरारली गुलबक्षी!
सांज अशी अवतरली
अप्सराच कुणी थिरकली
फुलवून शब्द पिसारा
नाचली धुंद मयुराक्षी
सांज उतरली खाली
दशदिशात काजळलेली
शब्दांचे तोरण झुलते
गगनाच्या विशाल वक्षी !
© प्रभा सोनवणे
संपर्क – “सोनवणे हाऊस”, ३४८ सोमवार पेठ, पंधरा ऑगस्ट चौक, विश्वेश्वर बँकेसमोर, पुणे 411011
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
