Category: कवितेचा उत्सव 2

डॉ.सोनिया कस्तुरे

 कवितेचा उत्सव 

☆ मराठी भाषा गौरवदिना निमित्त – माझी मराठी… ☆ डॉ. सोनिया कस्तुरे ☆

(मराठी भाषा गौरवदिनाच्या हार्दिक शुभेच्छा…!)

मला मराठीची गोडी

माझी माय माऊली मराठी

लिहिते, वाचते मराठी

माझा अभिमान मराठी.. !

अभंग,भजन, मराठी

ज्ञानोबा, तुकोबा मराठी

जनाई, बहिणाबाई मराठी

साधुसंतांचे महात्म्य मराठी..!

ओव्या, भारुड मराठी

परिवर्तनाची नांदी मराठी

सावित्रीमाय जोतीबांची

पहिली शाळा मराठी..!

मला आवडे मराठी

माझ्या ध्यानी मनी मराठी

माझा आचार,विचार मराठी

माझा स्वाभिमान मराठी..!

माझी अनुभूती मराठी

माझा शिवराय मराठी

मावळ्याच्या संगे राजा

बोलला माय मराठी..!

माझा उत्साह मराठी

वेदना, संवेदना मराठी

माझ्या हळव्या मनाला

मोठा दिलासा मराठी..!

माझा आदर्श मराठी

माझी प्रेरणा मराठी

माझ्या भावनेतला ओलावा

माझे जगणे मराठी..!

प्रथम गिरवू मराठी

मग मिरवू मराठी

नित्य बोलते मराठी

वंदू थोरवी मराठी

© डॉ.सोनिया कस्तुरे

विश्रामबाग, जि. सांगली

भ्रमणध्वनी:- 9326818354

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

श्री रवींद्र सोनावणी

 कवितेचा उत्सव 

उरलेले आयुष्य…  ☆ श्री रवींद्र सोनावणी ☆

काही न उरले देण्याजोगे

रित्या ओंजळी रिते खिसे,

घेणे आता नको वाटते

देण्याचे लागले पिसे ||

या व्यवहारी जगात आहे

देणे – घेणे नित्याचे,

देतांना नच मनात यावे

बदली काही घेण्याचे ||

हात देऊनी बुडणाऱ्याला

काठावर घेऊन यावे,

मरणाऱ्याला रक्त देऊनी

यथाशक्य ते जगवावे ||

भले न काही देता आले

मनस्ताप तरी देऊ नये,

चटके विझवा सांगुन चुटके

हास्य द्यावया विसरु नये ||

दीन जनांचे टिपण्या आसू

आयुष्य उरले खर्चावे,

मरणोत्तरही शरीर अपुले

अभ्यासास्तव अर्पावे ||

श्वासामधले भासही आता

ध्यास घेऊनी उठतील,

दुज्यास काही देता देता

दिवस सार्थकी लागतील ||

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ. जयश्री पाटील

 कवितेच्या उत्सव 

☆ वीर जवान तुझे सलाम… ☆ सौ. जयश्री पाटील ☆

प्रेमळ पाश घर सोडूनी

देशासाठी देतो बलिदान

वीर जवान तुझे सलाम

तूच खरा देशाचा सन्मान

धाडस शौर्य पराक्रमाची

तुझी चहुकडे बघ ख्याती

अभिमान तुझा प्रत्येकाला

कशी विसरेल तुझी आहुती

वर्दीचा मान ठेवूनी भान

सीमेवरती उभा राहतो

खडा पहारा तुझा सैनिका

त्यामुळे आम्ही सुखे नांदतो

आदर तुझा आहे सर्वांना

माथा नकळत नत होतो

धाडस हिम्मत तुझी पाहुनी

खरा हिरो तू आमचा होतो

© सौ. जयश्री पाटील

विजयनगर.सांगली.

मो.नं.:-8275592044

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

सौ.मंजुषा सुधीर आफळे

 कवितेचा उत्सव 

☆ देशाटन… ☆ सौ.मंजुषा सुधीर आफळे ☆

जग भ्रमंतीचा थोर

आनंद किती वर्णावा

ज्ञान ठेवा मिळवण्या

मनी उत्साह असावा

भौतिक त्या साधनांनी

जग समीप भासते

स्वकर्तृत्व जागवीत

ती देशाटन करते

अंतरा अंतरावर

वेशभाषा निराळीच

परी सूर्य चंद्र तोच

मूळ गाभा, सृष्टी तीच

सुखदुःख मानवाचे

सर्वत्र असे सारखे

तरी प्रेमळ नात्यास

कुणी न व्हावे पारखे

बुद्धी कौशल्याचा कस

साथ घेते अध्यात्माची

संघर्ष तो झेलताना

जोड आत्मविश्वासाची

चूल मुलं सांभाळून

संस्कारांना ती जपते

साता समुद्रा पार ही

ती वंदनीय ठरते

याची देही याची डोळा

पाहा, जे नितांत सुंदर

यशापुढे न पडावा

माय भूमीचा विसर.

© सौ.मंजुषा सुधीर आफळे

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈

मेहबूब जमादार 

 कवितेचा उत्सव 

☆ तुझी आठवण… ☆  मेहबूब जमादार ☆

तुझी आठवण सखे

मला विसरत नाही

तुझ्या घराची वाट

कशी हरवून जाई?

क्षण तुझ्या सहवासाचे

होते  अंगणा  भारून

तू जाता रानांतली

 पाखरे जाती काहुरुन 

तू जाता  परीसरी

बाग फुलणार नाही

दिसलीस ना तू जरा

पिक   डोलणार नाही

तुझ्या सौंदर्याने रात्र

चंद्राविना फुलत होती

आता तू जवळ नसता

सारी रात्र रडत होती

सखे तू असता जवळ

साऱ्या क्षणांना गं गंध

 सखे  तुझ्याविना आता

आज वाराही  झाला बंद  

कसे काढायचे दिस

 मला कळतच  नाही

सारे कळूनिया तुझे

पाऊल  वळतच  नाही…

© मेहबूब जमादार

मु -कासमवाडी पो .पे ठ  जि .सांगली

मो .9970900243

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈