सौ राधिका भांडारकर
कवितेचा उत्सव
☆ “विनाश (भुजंगप्रयात)…” ☆ सौ राधिका भांडारकर ☆
☆
उभा तो जिथे स्फोट झाला कुकर्मे
किती ही घरे हो जळाली कुणाची
कसे माणसा क्लेश झाले विनाशी
रिकामी स्मशाने हवेली भुतांची॥१॥
*
उरे तो कसा एकटा जीव त्याचा
कुटुंबीय त्याचे नुरे ना बिचारा
असा शोक त्याचा कसा कोण ऐके
भुकेल्या मुला कोण देईल थारा॥२॥
*
कशाला लढाया हव्या मानवाला
किती जीव ते मारले या भ्रमाने
कसे या मुलाने जगावे अनाथी
कसा मोकळा श्वास घ्यावा तयाने॥३॥
*
गुन्हा काय त्याचा मनाला विचारा
विनाकारणे तो जगी पारखा रे
सुखाचा तयाने कसा ध्यास घ्यावा
मिळावी कशी शस्त्र शांती खरी रे॥४॥
*
नको स्वार्थ सत्तांधता ही बळीची
हवी प्रेम माया मनीची जगाला
जपावी धरा ही असावी फुलांची
नको रक्तधारा तिच्या काळजाला॥५॥
☆
© सौ. राधिका भांडारकर
ई ८०५ रोहन तरंग, वाकड पुणे ४११०५७
मो. ९४२१५२३६६९
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
