श्रीशैल चौगुले
कवितेचा उत्सव
☆ वैशाख… ☆ श्रीशैल चौगुले ☆
☆
रणरण दुपार
वैशाख कडे-कपार
चटके देई माती
आभाळ पांढूर झार.
*
सावली उन्हे उब
शुकाट रस्ता नि रान
अंगाची लाही लाही
घामात चिंबून भान.
*
निस्तेज जित्राबात
त्राणच टिकवू पाही
ठिपका ढग कुठे
कसला सुगावा नाही.
*
मनात चिंता एक
मिरग कठिण भासे
काळ्या मातीची माया
फेकिल दुष्काळी फासे?
*
विश्वास येई जीवा
वार्याचा झोक जाणून
दिवस आशा धरे
दैवास गती मानून.
*
माणूस धरी धीर
पाखर पशूंचे काय?
झळाच सोसे धरा
डोळ्यातच पाणी, हाय!
☆
© श्रीशैल चौगुले
मो. ९६७३०१२०९०.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
