श्री तुकाराम दादा पाटील
कवितेचा उत्सव
☆ तारांगण… ☆ प्रा तुकाराम दादा पाटील ☆
☆
आहे तसाच कच्चा पिकलो अजून नाही
मी अंतरात माझ्या मुरलो अजून नाही
*
तपसाधना कराया विजनात वास केला
ज्ञानात पावसाच्या भिजलो अजून नाही
*
त्यांच्या धिम्या गतीने उलटून काळ गेला
काळासवे सुखाने फिरलो अजून नाही
*
बिथरून खूप राती दाऊन धाक गेल्या
भयमुक्त शांत निद्रा निजलो अजून नाही
*
काळीज जाळणारा सोसून दाह सारा
माळावरी उभा मी वठलो अजून नाही
*
पाठीवरील ओझे फेकून द्यायला मी
लांबून खूप आलो शिकलो अजून नाही
*
झोळी भरून माझी ओसंडते सुखाने
कुठल्याच वैभवाने दिपलो अजून नाही
*
कोरून कातळाला थकलोय खूप आता
स्वानंद जीवनाला भिडलो अजून नाही
*
ठरवून संकटांनी हल्ले बरेच केले
लाचार होउनी मी हरलो अजून नाही
*
निरखून भव्य सारे आकाश पाहिले मी
तारांगणी मला मी दिसलो अजून नाही
☆
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈ संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर ≈
