श्री रवींद्र सोनावणी
कवितेचा उत्सव
☆ – उरलेले आयुष्य… – ☆ श्री रवींद्र सोनावणी ☆
काही न उरले देण्याजोगे
रित्या ओंजळी रिते खिसे
घेणे आता नको वाटते
देण्याचे लागले पिसे
या व्यवहारी जगात आहे
देणे घेणे नित्याचे
देताना नच मनात यावे
बदली काही घेण्याचे
हात देऊनी बुडणा-याला
काठावर घेऊनी यावे
मरणा-याला रक्त देऊनी
यथाशक्य ते जगवावे
भले न काही देता आले
मन:स्ताप तर देऊ नये
चटके विझवा सांगून चुटके
हास्य द्यावया विसरू नये
दीनजनांचे टिपण्या आसू
आयुष्य उरले खर्चावे
मरणोत्तर हि शरीर
आपुले अभ्यासास्तव अर्पावे
श्वासामधले भास आता
ध्यास घेऊनही उठतील
दुज्यास काही देता देता
दिवस सार्थकी लागतील
© श्री रवींद्र सोनावणी
निवास : G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५
मो. क्र. ८८५०४६२९९३
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
