श्रीमती मीनाक्षी सरदेसाई
कवितेचा उत्सव
☆ दिवस कवींचे ☆ श्रीमती मीनाक्षी सरदेसाई ☆
☆
दिवाळी अंकाचे दिन आले
निवेदनांचे वृत्त पसरले
चित्त कवींचे प्रसन्न झाले
रटपट, लटपट, खटपट करुनी अनेक कविता धाडतात..
☆
काही कविता प्रसिद्ध होती
परि अनेक साभार परतती
तरी कवी नाराज न होती
इकडुन तिकडे तिकडून इकडे कविता प्रवास करतात.
☆
उत्साही कुणी करी निवेदन
राज्यस्तरीय कविसंमेलन
नको निमंत्रण, नको मानधन
अध्यक्षांसह, प्रमुख पाहुणे , कविवर्यही जमतात.
☆
“कविता वाचा तीनमिनिटांची
जरुर नाही प्रस्तावनेची
ओळख सांगू नका कवीची “
नवसे, गवसे, हौसे ,खासे अपुली काव्ये वाचतात.
☆
अशी अवस्था केविलवाणी
तरीही नाही निराश कोणी
उमेदीने, नव्या दमाने, पदरमोडिने
“काव्यांजली”प्रसवताती.
☆
कविवर्य तसे पक्के असती
प्रथम आपुले काव्य वाचती
ते झाल्यावर निघून जाती
श्रोत्यांमध्ये, नात्यामधले मोजकेच उरतात.
☆
© श्रीमती मीनाक्षी सरदेसाई
संपर्क – ‘अनुबंध’, कृष्णा हॉस्पिटल जवळ, सांगली, 416416.
मो. – 9561582372, 8806955070.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
