मराठी साहित्य – कवितेचा उत्सव ☆ रुपे पाऊसाची ☆ सौ. विद्या पराडकर ☆

सौ. विद्या पराडकर

 कवितेचा उत्सव 

☆ रुपे पाऊसाची ☆ सौ. विद्या पराडकर ☆

आला आला पाउस आला

हासत,नाचत,बागडत आला

कधी गर्जत ‌धुवांधार

कधी मंद्र सप्तकातील कलाकार ☘️

घननिळा बरसला

धरतीच्या कलशात

जीवन दान देई वसुंधरेला

नव निर्माणाचे रंग रंगविण्यात ☘️

कधी खेळतो विद्युल्लतेच्या तालावर

कधी नाचतो ढोलकीच्या ठेक्यावर

कधी गातो मेघ मल्हार च्या सुरावर

कधी भूप तर कधी यमनच्या लयीवर☘️

शिवाच्या कधी तांडव नृत्यासम

रुप तुझे हे प्रलयंकारी

जीवनाधार देवदूत कधी बनतो

कधी वाटतो विनाशकारी दैत्यासम☘️

कधी बनु नको रे दुर्योधना सम

अश्र्वथाम्या सम नको होऊ रे क्रूर

कृष्ण बनुनी ये पृथ्वीवर

रक्षण करी जीवन दे अर्जुनासम☘️

चित्र रेखाटे मानसीचा चित्रकार

तुझी अनेक रुपे कोरली हृदयपटलावर

संभ्रम होतो मानव येथे

अनेक रुपांचा तू गुच्छ मनोहर☘️

संतुलनाचे ऋतुमान कार्य करिशी

तेव्हा खेळे तू यश:श्रीशी

चर अचर  सारा तव  ओंजळीत

जीवन सारे कृतार्थ करिशी ☘️

© सौ. विद्या पराडकर

वारजे  पुणे..

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈