श्री सुहास सोहोनी
कवितेचा उत्सव
☆ एक विशेष दिवस… ☆ श्री सुहास सोहोनी ☆
कधीतरी रोजचीच सकाळ
वेगळीच किमया करून जाते
पालथ्या पडल्या हातावर
अत्तर फाया फिरवून जाते …
रोजचीच साखर, रोजचीच पावडर
रोजचंच दूध, नि रोजचंच पाणी
रोजचीच बशी नि रोजचाच कप
गंजही रोजचा नि रोजचीच गाळणी
तयारी तीच नि सरंजामही तोच
लगबग तीच नि उत्साह तोच
चवही तीच आणि चहाही तोच
करणारा तोच, नि घेणारा तोच,
पण आजचा दिवस खास आहे
ओल्या पाउसधारांचा आहे
भागलेल्या काळोखी सूर्याचा आहे
वाफाळता चहा समोरआहे
गरम गरम पहिला घोट तर
“आह्” ची दाद घेतो आहे …
अगदी खरं सांगायचं तर
सारं काही तेच असतं
आपलंच मन एखाद्या दिवशी
फुलपाखरू होऊन बागडत असतं
कालचं रंगित फूल त्याला
आज जास्त भावतं
कालच्यापेक्षा मध आज
जास्त गोड लागतो
एक नवल गुपित मात्र
त्याचं त्याला माहित नसतं
पंखांवर आज त्याच्या
इंद्रधनू नाचत असतं
अशी जादू घेउन येतो
तो दिवस हसरा असतो
मी विश्वाचा विश्वही माझे
सुखाचा मंत्र देऊन जातो
आजचा दिवस तर विशेष आहे
दुप्पट तिप्पट सुखाचा आहे
कारण त्याचं खमंग आहे
चहाआधी कांदाभजी
पोटात जाऊन बसली आहेत …..!!
😃
© सुहास सोहोनी
रत्नागिरी
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈