सुश्री प्रणिता प्रशांत खंडकर
कवितेचा उत्सव
☆ आला पाऊस… ☆ सुश्री प्रणिता प्रशांत खंडकर ☆
आला पाऊस प्रेमाचा,
त्याच्या सांगू किती तऱ्हा,
जसा ज्याच्या मनी भाव,
त्याला भिजवतो तसा.
आला पाऊस प्रेमाचा,
माऊलीच्या वात्सल्याचा,
उरी पाझरला पान्हा,
कुशीत विसावे तान्हा!
आला पाऊस प्रेमाचा,
बोट बापाचे धरता,
आनंद नि विश्वासाचा,
ठेवा गवसला पोरा!
आला पाऊस प्रेमाचा,
गुरू-शिष्यांच्या जोडीचा,
गिरविता अक्षरांना,
वसा घेतला ज्ञानाचा.
आला पाऊस प्रेमाचा,
सखा जीवाचा भेटता,
सुख-दुःखाच्या क्षणांना,
त्याचा कायम आसरा.
आला पाऊस प्रेमाचा,
प्रियतमांच्या भेटीचा,
सात-जन्माच्या साथीच्या,
निभावण्या आणा-भाका!
आला पाऊस प्रेमाचा,
विरह-वेदना देणारा,
जन्म-मृत्यूचा हा फेरा,
अव्याहत चालणारा.
आला पाऊस प्रेमाचा,
भक्तिरसात डुंबुया,
कल्याणासाठी विश्वाच्या,
आळवू पसायदाना!
© सुश्री प्रणिता प्रशांत खंडकर
संपर्क – सध्या वास्तव्य… डोंबिवली, जि. ठाणे.
ईमेल [email protected] केवळ वाॅटसप संपर्क.. 98334 79845.
ही कथा आवडल्यास लेखिकेच्या नावासह आणि कोणताही बदल न करता अग्रेषित करण्यास हरकत नाही.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈