श्री आशिष बिवलकर
चित्रकाव्य
– विरह…– ☆ श्री आशिष बिवलकर ☆
☆
आठवणींच्या आसवांनी,
भिजले भूतकाळाचे पान !
तुझ्याचसाठी रे झुरतेय मी,
नशिबाने चूकवले तुझे दान !
☆
दिवस उगवतो अन् मावळतो,
छळते ती मज अनामिक कातरवेळ !
अपूर्ण आणाभाकांची सल टोचे मनी,
अपूर्णत्वाने खेळते जीवनाचा खेळ !
☆
दाटून येतात रोज,
आठवणींचे काळे ढग !
भिजवतात ह्रदयाला,
दुरावला कसा तू जिवलग !
☆
माझं हास्य मलाच फसवी,
जगात हसत कशी वावरतेस !
तुझ्या स्मृतींच्या क्षणाला,
एकल्या विश्वात का बावरतेस !
☆
नियतीच्या कुंचल्यातील फटकाऱ्यांनी,
रेखाटलंय जीवनाचं अजब व्यंगचित्र !
कुणीही हसावं, कुणीही बोलावं,
भावनांनी खेळ मांडलाय विचित्र !
☆
हृदयाच्या किनाऱ्यावर आदळतात,
आठवणींच्या रोज आक्राळ लाटा !
तुझ्या माझ्या आयुष्यात दुभंगलेल्या,
चालतेय काट्यांनी सजलेल्या वाटा !
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
