सौ. नेहा लिंबकर
कवितेचा उत्सव
☆ मी एक सामान्य… ☆ सौ. नेहा लिंबकर ☆
भोवतालच्या घटनांकडे तटस्थपणे बघणारा
मनातल्या सार्या उद्रेकांना थोपवणारा
आणि बाहेर काहीच न बोलणारा
मी एक सामान्य
जागोजागी थुंकताना समोरच बघत असणारा
रागाचा पारा आतल्या आत वाढवणारा
आणि बाहेर काहीच न बोलणारा
मी एक सामान्य
आया बहिणींचा अपमान तटस्थपणे बघणारा
गुंडगिरीचा कळस बघून अस्वस्थ होणारा
आणि बाहेर काहीच न बोलणारा
मी एक सामान्य
खोट्या बातम्या मुखवट्यांचा राग येणारा
आत्मकेंद्री, स्वार्थी अन् बेफिकिरीवर उचकणारा
आणि बाहेर काहीच न बोलणारा
मी एक सामान्य
मी बोलून काहीच नाही बदलणार
हाच विचार पक्का असणारा
‘मी’ च का ? या घोळात अडकणारा
सामान्यांच्या रेषेत चपखल बसणारा
आणि बाहेर काहीच न बोलणारा
मी एक सामान्य
ह्या चक्रातून बाहेर पडायला
मोकळ्या श्वासाने जगायला
जिद्दीने विवेकाने स्पष्ट बोलायला
एकदातरी ह्यातून बाहेर पडायला
चला बदल घडवायला
सामन्यांत असामान्य व्हायला.
© सौ. नेहा लिंबकर
पुणे
मो – 9422305178
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈