सौ. वर्षा सुभाष शिंदे
अल्प परिचय
शिक्षण – B.A.,B,Ed
29 वर्षांपासून प्राथमिक शिक्षिका म्हणून कार्यरत आहे. लेखन,वाचन,अभिवाचनाची आवड. गायनाची आवड आहे.
कवितेचा उत्सव
☆ आभास… ☆ सौ.वर्षा सुभाष शिंदे ☆
तलम रेशमी तरल मखमली
पटल अलगद दूर सारूनी
स्वप्नात प्रिये गं विहरावे
धुक्याची पहाट तू होऊन यावे
तनुवरी तव दिसती खुलूनी
अलंकार दवबिंदुंचे रमणी
चंद्रवदन अन् आले फुलूनी
प्राचीच्या कोमल किरणांनी
नाजूक सुंदर अधरांमधूनी
कुंदकळ्या डोकावती
गौर गुलाबी गालांवरती
गुलाब लाल उमलून येती
कुंतलामधे काळ्या कुरळ्या
चांदण्या नभीच्या माळल्या
गाली हसता गोडशा खळ्या
सडा मोतियांचा पडला
छंद लागला तुझा जीवाला
जाहलो प्रेमात वेडा खुळा
आभास तुझा प्रिये मधुबाला
जीवनास व्यापूनिया उरला
© सौ. वर्षा सुभाष शिंदे
कोथरूड.
०९/११/२०२२
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈