सौ. उज्वला सुहास सहस्रबुद्धे
☆ माय मराठी ☆ सौ. उज्वला सुहास सहस्रबुद्धे ☆
जन्म कुसुमाग्रजांचा ,
सौभाग्य महाराष्ट्रा चे!
लाभे कृपा शारदेची ,
भाग्यवंत आम्ही येथे !
माय मराठी रुजली,
अमुच्या तनामनात!
दूध माय माऊलीचे,
प्राशिले कृतज्ञतेत !
साहित्य अंकी खेळले,
लेख, कथा अन् काव्य!
माऊलीने उजळले ,
ज्ञानदीप भव्य- दिव्य!
घेतली मशाल हाती ,
स्फुरे महाराष्ट्र गान !
भक्तीचे अन् शौर्याचे,
राखले जनी हे भान!
ज्ञानेश्वरी ज्ञानयाची,
सोपी भाषा तुकयाची!
मराठी रामदासांची ,
समृद्धी माय मराठीची!
सौंदर्यखनी मराठी,
कौतुक तिचे करू या!
मी महाराष्ट्रीय याचा,
अभिमान बाळगू या!
© सौ. उज्वला सुहास सहस्रबुद्धे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈