मराठी साहित्य – कवितेचा उत्सव ☆ सण संक्रांतीचा ☆ श्री सुहास रघुनाथ पंडित ☆

श्री सुहास रघुनाथ पंडित

 कवितेचा उत्सव 

☆ सण संक्रांतीचा ☆ श्री सुहास रघुनाथ पंडित ☆

तीळागुळाचा स्निग्ध गोडवा

असाच वाढत जावा

शुभ्र चांदणी परी फुलावा काटेरी हलवा.

तीळातीळातून स्नेह वाढवा

कणाकणातून प्रेम,गोडवा

तीळगुळाच्या मधुर मिलनी भाव असा रंगावा

शुभ्र चांदणी परी फुलावा काटेरी हलवा.

शीतल वारे येत रहावे

दवबिंदूंना पंख फुटावे

कुडकुडणा-या गात्रांमधूनी स्नेहदीप उजळावा

शुभ्र चांदणी परी फुलावा काटेरी हलवा.

काट्यातूनही फुलत रहावे

गोडीसाठी तन झिजवावे

परस्परातील स्नेह वाढता क्षणाक्षणाचा सण व्हावा

शुभ्र चांदणी परी फुलावा काटेरी हलवा.

तीळगुळाचा स्निग्ध गोडवा असाच वाढत जावा

शुभ्र चांदणी परी फुलावा काटेरी हलवा .

© सुहास रघुनाथ पंडित 

सांगली (महाराष्ट्र)

मो – 9421225491

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈