मराठी साहित्य – कवितेचा उत्सव ☆ आले आभाळ भरून… ☆ श्री रवींद्र सोनावणी ☆

श्री रवींद्र सोनावणी

 कवितेचा उत्सव 

☆ आले आभाळ भरून… ☆ श्री रवींद्र सोनावणी ☆

 आले आभाळ भरून   

 मनी लागे हूरहूर

 पोर अल्लड कालची

 झाली आज उपवर  ||१ ||

 लेक परक्याचे धन

 असे सांगे जनरीत

 तरी काळजाची व्यथा   

 वाटे सांगावी कानात||२ ||

 आता सोडून जाईन

 सुने होईल अंगण

 तिचे  बालपण सारे 

 मनी घालील रिंगण||३ ||

 भोळीभाबडी लाडली  

 खूप वाढली लाडात

 तिच्या श्वासांची बासरी 

 रोज घुमते घरात ||४||

 सुने सुने च  घरटे

 मुकी झाली किलबिल    

 मन चाहूल घ्यावया 

 घरभर पसरेल |५||

 तिच्या स्वप्नातले गाव 

 एका हाकेवर आले

 तरी वात्सल्याचे मोर 

 उगा आसवात न्हाले||६||

अशा आनंदाच्या क्षणी

मनी उठते काहूर

आणि डोळ्यात मावेना

 मुक्या आसवांचा पूर||७||

© श्री रवींद्र सोनावणी

निवास :  G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५

मो. क्र.८८५०४६२९९३

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈