श्री सुहास सोहोनी
कवितेचा उत्सव
☆ पांथस्थास… ☆ श्री सुहास सोहोनी ☆
चल पांथस्था झाली आता
परतीची वेळ
जोडिलास जो मेळ तयाचा
आवर आता खेळ ॥
दिनमणि उगवुन ढळला आता
दिशा पश्चिमेला
रात्र तमाची होण्याआधी
वळवी तव पाउला ॥
नेई तुझिया संगे येथिल
स्मृती शुचिर्भूत
राहु द्यावे इथेच येथिल
अमंगलाचे भूत ॥
सर्वव्यापी चैतनाचा अतूट
तू अंश
अवनीवरती परी पाहुणा
होउनि आलास ॥
नच स्वामी तू धनि वा मालक
इथल्या धूलिकणाचा
पाहुणेर तुज मिळोनि गेले
वाटा तव भाग्याचा ॥
मंगल घटिका येइल आता
ठेवाया प्रस्थान
पंचभूती मग विलीन होता
सोन्याचा तो दिन ॥
जातांना परि संगे न्यावे
संजीवक ते वित्त
ओवि-अभंगी लपले
जे अन् पसायदानात
स्वस्थचित्त हो त्या लोकीही
मनास ठेवुन साक्षी
स्थलकालाच्या अतीत होऊनि
वितळुनि जाय गवाक्षी ॥
© सुहास सोहोनी
रत्नागिरी
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
