मराठी साहित्य – मनमंजुषेतून ☆ एक उलट एक सुलट – लेखक – अज्ञात ☆ प्रस्तुती – सुश्री सुलू साबणे जोशी ☆

सुश्री सुलू साबणे जोशी

 मनमंजुषेतून 

☆ एक उलट एक सुलट – लेखक – अज्ञात ☆ प्रस्तुती – सुश्री सुलू साबणे जोशी ☆ 

श्वास रोखून धरत एक टाका सोडायचा –

दुसरा अलगद उचलायचा, मग चार उलट चार सुलट –

आई शिकवायची तेव्हा कटकट वाटायची फक्त –

कधी वीण विसविशीत, तर कधी घट्ट – 

ती म्हणायची….असंच असतं सुरुवातीला–

एखादा जास्तीचा सुटायचा – एखादा दाटायचाच.–..

पण मनासारख्या वीणेसाठी श्वास मात्र रोखायचा –

सांगायची..

टप्प्यावर धागे बदलताना जोड नकोत दिसायला –

सोडलेल्या टाक्यांचे भगदाड नको वाटायला आणि –

तेच पुन्हा ओवतांना नक्षीत हवेत शोभायला –

तेव्हा वाटायचं…

हिला काय आहे बोलायला !–

पण

आज इतक्या वर्षांनंतर सारं सारं उमगतंय–

एक मन जपताना दुसरं सुटेलसं वाटतंय–

तरी ओवून सारं एकत्र नक्षीत घ्यायला जमतंय—

मुलांचे चार सुलट , परिवाराचे उलट—

यजमानांचे –एक उलट दुसरा सुलट –

आणि माझे? 

गरजेनुसार कधी चार सोडायचे  – कधी सुटलेले अलगद उचलायचे—

हं, तसा रंग आता थोडा फिकट होतोय 

पण…… 

असो गुंता कितीही, उकल करता येतेय…. 

नक्षी असो कठीण कितीही, वीण घालता येतेय…

ह्यालाच तर जगणं म्हणतात ना…..

लेखक – अज्ञात 

संग्राहिका : सुश्री सुलू साबणे जोशी 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈