श्रीमती अनुराधा फाटक
कवितेचा उत्सव
☆ जीवन… ☆ श्रीमती अनुराधा फाटक ☆
जगी या जन्मा यावे
मन पाखराचे घ्यावे
पंख गरुडाचे असावे
मुंगी होऊनी जगावे !
नको मारणे टोचींचे
दंतव्रण जिव्हारीचे
पोळयामधून मधाचे
थेंब थेंब निथळावे !
जीवनाची अर्धी भाकरी
कोर त्याची चंद्र चकोरी
वाढत वाढत जाणारी
जीवनाची ही शिदोरी !
नको होवो चंद्र पूर्ण
कलंक तो मागे लागे
चंद्रकोरीसम निखळ
जीवन मम असावे !
© श्रीमती अनुराधा फाटक
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
