सुश्री दीप्ती कुलकर्णी
कवितेचा उत्सव
☆ श्रावणसरी… ☆ सुश्री दीप्ती कुलकर्णी☆
अशीच एखादी सर येते
हळुच शिडकावा करुन जाते.
तापलेल्या क्लांत भूमीबरोबरच
तप्त मनासही शीतलता देते.
श्रावणसरीतील ओलाव्याने
सृष्टी-सखी न्हाऊन निघते
तृप्त मनीच्या संतोषाने
अणुरेणूलाही चिंब करते.
तृप्त धरती गंधित होते
हेमपुष्पही जन्म घेते.
शिवार सारे फुलून जाते
आगळ्या सौंदर्ये धरती नटते.
सृष्टीसखीचा बहार पाहून
तनमनही रोमांचित होते
जलधारांना दुवा देते
शिवारातील सोनं वेचू पाहते.
© सुश्री दीप्ति कुलकर्णी
कोल्हापूर
≈संपादक – श्री हेमन्त बावनकर/सम्पादक मंडळ (मराठी) – सौ.उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
