सौ अंजली दिलीप गोखले
मनमंजुषेतून
☆ एका गृहिणीचं मनोगत – श्री सुहास आपटे ☆ प्रस्तुती – सौ अंजली दिलीप गोखले ☆
माझं असं का होत माझं मला कळत नाही !
बरं, दर वेळेला असंच होतं पण उत्तर काही मिळत नाही !
घरात प्रचंड पसारा असतो त्याचवेळी सगळे येतात,
फर्निचरच्या धुळीवरून हळूच एक बोट फिरवतात !
मी मनात खजील, तर ते गालातल्या गालात हसत असतात,
बाई फारच आळशी म्हणून चक्क एक शेरा ठोकतात !
घर टकाटक आवरल्यावर कुणीच कसं येत नाही?
माझं असं का होतं माझं मला कळत नाही !
बरं, दर वेळेला असंच होतं पण उत्तर काही मिळत नाही !
दिवसभराच्या कामानं मीही दमलेली असते !
रात्री फक्त खिचडी हीही ठरलेली असते !
किचनचा लाइट off करणार, तेवढ्यात बेल जोरात वाजते,
surprise म्हणून पाहूणे येतात, खिचडीला पाहून नाके मुरडतात,
चार पदार्थ वेगळे असतात तेव्हा कुणीच कसं येत नाही?
माझं असं का होतं माझं मला कळत नाही !
बर, दर वेळेला असच होत पण उत्तर काही मिळत नाही !
कधीतरी माझ्या हातात चार पैसे खुळखुळत असतात,
लक्ष्मी रोडवरचे dress आता मला बोलवायला लागतात,
त्यांच्या हाकेला ओ देऊन मी लगेच पुण्याला जाते,
नेमके त्याच वेळी सेल संपून हाय प्राइस लागते !
matching आणि size चे ही गणित का जुळत नाही,
माझं असं कां होतं माझं मला कळत नाही !
बर, दर वेळेला असंच होतं, पण उत्तर काही मिळत नाही !
गणिताचाच पेपर माझ्या स्वप्नात येतो,
पेपर चालू झाला पण मला उशीर झालेला असतो,
मायनस झिरो मार्क मला दिसायला लागतात,
भीतीने लटपट पाय कापायला लागतात !
स्वप्नात तरी मी विद्यापीठात पहिली का येत नाही?
माझं असं का होतं माझं मला कळत नाही !
बरं, दर वेळेला असंच होतं पण उत्तर काही मिळत नाही !
नेहमीच मी ठरवते जरा कमी बोलायचं,
स्वतःचीच टकळी लावण्याआधी दुसऱ्याचं थोडं ऐकून घ्यायचं !
परदेशातून मावशी आली, मी माझीच cassette लावली,
Backlog भरून काढण्यासाठी मी बडबड चालू केली !
मौनाचं महत्त्व माझ्यासाठी का applicable होत नाही?
माझं असं का होतं माझं मला कळत नाही !
बरं ,दर वेळेला असंच होतं, पण उत्तर काही मिळत नाही !
आत्ताच मी ठरवलं मुद्दाम काही लिहायचं नाही,
ओढून ताणून शब्द जुळवून कविता त्याला म्हणायचं नाही !
कुणीही काहीही म्हटले तरी कवयित्री अशी होत नसते,
आपलीच फजिती इतरांना सांगून पाठ आपली थोपटायची नसते !
तरीही मी लिहायचं कधी सोडत नाही,
माझं असं का होतं माझं मला कळत नाही !
बरं, दर वेळेला असंच होतं, पण उत्तर काही मिळत नाही……।।
– श्री सुहास आपटे.
प्रस्तुती – सौ अंजली दिलीप गोखले
मोबाईल नंबर 8482939011
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
