मराठी साहित्य – कवितेचा उत्सव ☆ अखेरचा मुजरा…. ☆ सौ.ज्योत्स्ना तानवडे

सौ.ज्योत्स्ना तानवडे

 कवितेचा उत्सव 

☆ अखेरचा मुजरा…. ☆ सौ.ज्योत्स्ना तानवडे ☆ 

 बाबासाहेब बळवंत मोरेश्वर पुरंदरे 

आदरणीय शिवशाहीर बाबासाहेब पुरंदरे यांना विनम्र अभिवादन.

इतिहासाच्या वाटेवरचा

देखणा प्रवास सरला

शिवधर्माचा सच्चा उपासक

शिवतेजात विलीन झाला  ||

कित्येक दशके तळपली

ज्यांच्या वाणीची तलवार

शिवरायांची कथा मांडली

तेजस्विता जिची अपरंपार ||

असंख्य शब्दोत्सवातूनी

शिवप्रेमाचे बीज रुजविले

शिवतेजाची ओढ लावुनी

शौर्य स्फूर्तीचे वेड लाविले ||

‘जाणता राजा’ महानाट्यातून

साक्षात शिवशाही उभी केली

त्या दैदिप्यमान पर्वाची धग

असंख्यांनी अनुभवली ||

त्या वाणीला विराम मिळता

शिवकथा आज मूक झाली

शिवशाहीर बाबासाहेबांना

विनम्र आदरांजली !! ?

© सौ.ज्योत्स्ना तानवडे

वारजे, पुणे.५८

≈ संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈