सौ. गौरी गाडेकर
📖 वाचताना वेचलेले 📖
☆ कवी मंगेश पाडगावकरांच्या घरात चोरी ☆ प्रस्तुती – सौ. गौरी गाडेकर ☆
कवी मंगेश पाडगावकरांच्या घरात चोरी
पाडगावकर त्या चोराचेच कौतुक करत होते ही हकीगत सांगताना.
इतक्या भर पावसात तो पाईपवरून चढला कसा असेल? दुसऱ्या मजल्यावरच्या आमच्या खोलीत शिरला कसा असेल? खरंच काही कल्पना करवत नाही !
तरी एकाने थट्टेने विचारले ,”कवितांचे हस्तलिखित त्याने नेले नाही ना?”
तेव्हा पाडगावकर म्हणाले, ” माझे दुःख त्यापेक्षा जास्त आहे. मी पोलिस स्टेशनवर गेलो .तक्रार केली. काही दागिने, वस्तू गेल्या होत्या, त्याची माहिती दिली व नंतर उत्सुकतेने त्या पोलिस अधिकाऱ्यास म्हटले,’मला साहित्य अकादमीने दिलेले एक मेडल त्यात होते, तेही चोराने नेले आहे’.
पोलिस अधिकाऱ्याने मान वर करून विचारले ,’ते कशाचे होते?’ ”
पाडगावकर म्हणाले ,”साधेच असते.काही खास मेटल त्यासाठी वापरले जाते असे नाही .”
“मग चिंता कशाला करता? घराजवळच शोधा.चोराने ते निश्चितच रस्त्यावर टाकले असेल”.
पाडगावकर घरी आले.आपल्या घराच्या जवळच्या रस्त्यावर पाहिलं मग गटारात पाहिलं .
साहित्य अकादमीने ‘सलाम’ कवितासंग्रहाला दिलेले ते पदक चोराने खरोखरच गटारात टाकले होते.त्याच्या लेखी त्या पदकाची किंमत शून्य होती.पाडगावकरांनी ते आनंदाने उचलले.
साहित्य अकादमीचे पदक फक्त मिळाले, बाकीचे सर्व गेले, कारण ते मौल्यवान होते!!!!
पाडगावकर म्हणाले, माझा चोराला सलाम
—तेच ते.
लेखक : अज्ञात.
संग्राहिका :सौ. गौरी गाडेकर.
संपर्क – 1/602, कैरव, जी. ई. लिंक्स, राम मंदिर रोड, गोरेगाव (पश्चिम), मुंबई 400104.
फोन नं. 9820206306
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
