श्री आशिष बिवलकर
चित्रकाव्य
– रक्षाबंधन… – ☆ श्री आशिष बिवलकर ☆
☆
दगडांच्यात आयुष्य,
दगडाचा बसायला पाट !
पारणं डोळ्यांचं फिटलं ,
पाहून रक्षाबंधनाचा थाट !
☆
रस्ता बनवता बनवता,
मुलं बाळं वाढती रस्त्यावर !
सणवार त्यांनाही असतात,
पण हक्काचे कुठे नाही घर !
☆
विंचवासारखे बिऱ्हाड,
फिरे गावोगाव पाठीवर !
पोटासाठी मोलमजुरी,
नशिबाने बांधल्या गाठीवर !
☆
रंक असो वा राव ,
भावा बहिणीत तेवढीच ती ओढ !
आपल्या आपल्या परीने ते,
साजरा करती सण आनंदाने गोड !
☆
राखीचा धागा,
सोन्याचा असो वा रेशमचा !
मनगटाला शोभे,
भाव दोघांच्या मनी आपुलकीचा !
☆
औक्षणाचे ताट नसले तरी,
नेत्रज्योतीने बहीण करते औक्षण !
रक्षण कर छोट्या भाऊराया,
तुझे प्रेम तिच्यासाठी जगी विलक्षण !
☆
चिंधी बांधे द्रौपदी,
हरी धावला तिच्या रक्षणाला !
रक्ताचे नव्हते नाते,
जागला चिंधीच्या बंधनाला !
☆
© श्री आशिष बिवलकर
बदलापूर
मो 9518942105
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
