मराठी साहित्य – कवितेचा उत्सव ☆ बेधुंद…. ☆ सुश्री अरूणा मुल्हेरकर

सुश्री अरूणा मुल्हेरकर

 कवितेचा उत्सव 

☆ बेधुंद…. ☆ सुश्री अरूणा मुल्हेरकर ☆ 

अंधार दाटला चोहीकडे

मन झाले उदास

सूर आले भरभर जुळुनी

छेडिताना बिभास

प्रकाशल्या दशदिशा

बेधुंद मी खयालात

नुरले भान कशाचे

हरवले स्वर तरंगात

कलरव चाले विहगांचा

उडती स्वैर आकाशी

स्वच्छंदपणे भूमीवरती

खेळते मी सुरांशी

नव्हते कसले बंधन

वेळ काळाचे

जादुभर्‍या स्वरांना

फक्त कवटाळायाचे

सुरात असते भक्ति

सुरात असते शांति

विसरते देहभान

लाभे कशी मनःशांति

©  सुश्री अरूणा मुल्हेरकर

डेट्राॅईट (मिशिगन) यू.एस्.ए.

≈संपादक–श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे ≈