कविराज विजय यशवंत सातपुते
कवितेचा उत्सव # 252 – विजय साहित्य
☆ बालमोहिनी..! ☆
☆
बालरूपहे, श्रीरामाचे,
कपी बालके,भवताली.
प्रेमळ मोहक,सुहास्यवदनी,
राम सानुला,वनमाळी. १
*
चंद्र प्रभेने, झळके मुद्रा,
तेजस लोभस,रामाची
सशस्त्र होऊन, खेळ खेळतो,
वानर बाळे,कामाची .२
*
दिठी तयाची,चित्ताकर्षक,
स्मितहास्याने, भरलेली.
मूर्त साजिरी,बाल शशीची
आभुषणांनी,सजलेली.३
*
माळ केशरी,वस्त्र केशरी,
उत्साहाच्या बलभीमा.
मुकुट शिरीचा,वेष राजसी
अध्यात्माच्या, परिसीमा.४
*
त्याग समर्पण,धैर्य वीरता,
पुरुषोत्तम हा,करी लिला.
रूप हरिचे, बाल सोबती,
वेचक वेधक,राम लिला.५
*
आनंद शक्ती, रामा ठायी
रामबाण हे, रूप नवे.
पहा भोवती,श्रीरामाच्या
बागडणारे, कपी थवे.६
*
बाल रुप हे,रघु रायाचे,
चराचराला, असे लळा.
दशरथ नंदन, राम आगळा,
चैतन्याचा,फुले मळा.७
*
राम रूपाची,बाल मोहिनी
सालंकृत हा दिसे हरी.
राजस लोभस,छबी आगळी,
प्रत्येकाच्या,हवी घरी.८
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
