मराठी साहित्य – कवितेचा उत्सव ☆ सप्तरंग इंद्रधनुचे ☆ सौ.मंजिरी येडूरकर ☆

सुश्री मंजिरी येडूरकर

 कवितेचा उत्सव 

☆ सप्तरंग इंद्रधनुचे ☆ सौ.मंजिरी येडूरकर ☆

☆

आई सांगे,

इंद्रधनूच्या कमानीवरूनी गवसते स्वर्गाचे दार

कशास हवे जर, इथेच आहे, सौंदर्य अपरंपार

*

चला पाहू या ,सातरंगांची किमया ही मजेदार

तांबडा रंग आकाश धरेच्या मीलनाचा साक्षीदार

*

नारिंगी तर निसर्गाच्या अचाट शक्तीची धार

पिवळा भंडारा भक्तीचा अन् आरोग्याचा मूलाधार

*

हिरवाईने नटली धरणी, देते समृद्धीचा हात उदार

निळा दावी अथांगता, सात्विकतेचा शिल्पकार

*

पारवा न्यायाचा, निष्ठेचा, नि रूढी, परंपरांचा तारणहार

जांभळा सळसळणाऱ्या रक्ताचा, कणखरतेचा दावेदार

*

सात रंगांच्या एकरूपतेने होतो, धवलतेचा साक्षात्कार

जसे,त्रिगुणाच्या प्रभावाने बनतो, निर्गुण,निराकार!!!

☆

© सौ.मंजिरी येडूरकर

लेखिका व कवयित्री, मो – 9421096611

≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈