सुश्री वर्षा बालगोपाल
कवितेचा उत्सव
☆ ती… ☆ सुश्री वर्षा बालगोपाल ☆
(गागागागा गागागागा गागागागा)
☆
रोजच घेते आव्हाने ती बाई असते
कारुण्याचा जी पान्हा ती आई असते
*
जाता रोजी रोटी साठी कामा कोणी
पोरांना जी वाढवते ती दाई असते
*
बघता हर नर वाटे तिजला दादा भाई
वाटो अपुली ताई वा ती माई असते
*
करते कामे सारी श्रद्धा नी सबुरीने
संघर्षाला फळ मिळते ती साई असते
*
दिनचर्या मग होते व्याघ्रा मागे घेउन
तारेवरची कसरत नी ती घाई असते
*
असती नाना ढंगी नाना रंगी रूपे
वज्रासम तर केव्हा मउ ती जाई असते
☆
© सुश्री वर्षा बालगोपाल
मो 9923400506
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈