मराठी साहित्य – कवितेचा उत्सव ☆ गोडी मातृभाषेची… ☆ सुश्री वृंदा (चित्रा) करमरकर ☆

सुश्री वृंदा (चित्रा) करमरकर

 कवितेचा उत्सव 

☆ गोडी मातृभाषेची… ☆ सुश्री वृंदा (चित्रा) करमरकर ☆

☆

गोडी मातृभाषेची

अमृतापरी साची

तिच्यात ओतप्रोत

माया साय-साखरेची

*

कीर्तनात विठू दंग

भजनात भक्ती रंग

ज्ञानोबा तुकोबांचे

अक्षर-धन अभंग

*

पोवाड्यात वीररस

लावण्य हे लावणीत

ओव्या भारुड जागर

भक्तीपूर्ण गोंधळगीत

*

काव्य कथा साहित्याने

परिपूर्ण  ही ज्ञानगंगा

नवरसयुक्त नवरत्नांचे

साज लखलखती अंगांगा

*

मराठीच्या संवर्धनाचा

ध्यास असो मनामनात

वाचू शिकूया मराठी

प्रसार करु जनाजनांत

☆

© वृंदा (चित्रा) करमरकर

सांगली

मो. 9405555728

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈