श्री शरद कुलकर्णी
कवितेचा उत्सव
☆ मला इतकेच म्हणायचे आहे… ☆ श्री शरद कुलकर्णी ☆
जेंव्हा घरभेदी भिंतीनीच
नात्यागणगोतात भिंती उभ्या
केल्या . .
कराकरा मिटली निष्ठुर दारं . .
बंदीच झालो घरातल्या –
कारागृहात. .नजरकैद भोगणारे
कैदीच. . .!
खिडकीतल्या गजावर तटतटून
माझे असहाय्य अपयशी हात. .
आणि बाहेर नुसताच काळोख
तेंव्हाही कवितांनीच केली
ना, टकटक . .
आपुलकीची सहिष्णू दस्तक. .
आणि डोळ्यातील ओलीचा –
आश्वासक पाऊस. .
अगदीच एकाकी नसतो आपण. .
मला इतकेच म्हणायचे आहे. .
© श्री शरद कुलकर्णी
मिरज
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
