सौ. उज्वला सुहास सहस्रबुद्धे
☆ मागे वळून पाहताना… ☆ सौ. उज्वला सुहास सहस्रबुद्धे ☆
मागे वळून पाहताना,
भुरळ घालती वाटा ..
अन् पुढे पहायचे मनाला,
धाडस नाहीयेत करता!….१
मागे वळून पाहताना,
वाट दिसे वळणावळणाची..
कशी सरली माहित नाही,
ती वाट होती चढणीची !….२
वाटते आता मनाला,
ही वाट परतीची नाही …
पण शेवट त्याचा कोठे,
हे ज्ञात कुणाला नाही !…३
मागे वळून पाहताना.,
खाचखळगे वाटेवरचे!
कधी जाणवले का नाही,
काटेरी त्या झुडुपांतळचे!..४
गूढ वलय अज्ञाताचे,
वाटे कुतुहल कधी भय!
एकाच ठायी विश्वासाचे ..
समजू ते ईश्वरी आलय!..५
मागे वळून पाहताना,
लाभे कधी सुखद गारवा!
त्या अनमोल अशा क्षणांचा ,
मनी जपला अजून ठेवा..६
© सौ. उज्वला सुहास सहस्रबुद्धे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈