सौ राधिका भांडारकर
कवितेचा उत्सव
☆ “वेगळा पाऊस…” ☆ सौ राधिका भांडारकर ☆
आजचा पाऊस जरा वेगळा
काहीसा खट्याळ लडीवाळ
हळुच कानाशी कुजबुजणारा
फारच उनाड पण मधाळ..
आजचा पाऊस जरा वेगळा
हळुच जाऊन पानांवर बसला
गार वार्याशी बोलता बोलता
थेंबाथेंबाने धरणीला चुंबत राहला…
आजचा पाऊस जरा वेगळा
पडू की नको पडू भावनांचा
हळुहळु होता आरंभाला
नंतर झाला वर्षाव धारांचा…
आजचा पाऊस जरा वेगळा
रानावनात स्वैरपणे हिंडला
चातकाच्या चोचीत ओघळला
अन् मोराचा पिसारा फुलवला..
© सौ. राधिका भांडारकर
ई ८०५ रोहन तरंग, वाकड पुणे ४११०५७
मो. ९४२१५२३६६९
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
