सुश्री वृंदा (चित्रा) करमरकर
कवितेचा उत्सव
☆ ओढ तीच अजूनही… ☆ सुश्री वृंदा (चित्रा) करमरकर ☆
ओढ तीच अजूनही
अजूनही तीच आस
क्षणोक्षणी, पानोपानी
तेच तेच तुझे भास
मनी आठव दाटतो
गंधाळले हे चांदणे
माझ्या तुझ्या भेटीचेच
सुखवती ते बहाणे
हास्य तुझे मधाळसे
लाजुनिया ते पाहणे
पावसाच्या धारांचे ते
चिंब चिंब भिजवणे
कडाडता नभी वीज
बिलगुनी मज जाणे
चिंब तुझ्या कुंतलात
माझे तुझे प्रेमगाणे
वाऱ्यावरी सखे तुझे
केस मोकळे मोकळे
गंधमळे दरवळता
जीव माझा तळमळे
दोन धृवांवरी जरी
आज दोघे विहरतो
कोंदणात मनाच्या ग
सुगंधल्या क्षणी न्हातो
© वृंदा (चित्रा) करमरकर
सांगली
मो. 9405555728
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈