कविराज विजय यशवंत सातपुते
कवितेचा उत्सव
☆ स्वामी कार… ☆ कविराज विजय यशवंत सातपुते ☆
(आज ८ एप्रिल. ज्येष्ठ प्रसिद्ध मराठी कादंबरी कार,साहित्यिक,स्वामीकार, पद्मश्री पुरस्कार प्राप्त मा. रणजित देसाई यांचा आज जन्मदिवस.त्या निमित्ताने केलेली ही स्वरचित अष्टाक्षरी काव्य रचना)
☆
कथा, कादंबरी नाट्य
स्वामीकार मानांकित
ग्रंथ श्रीमान योगीने
झाले ज्ञान शब्दांकित…! १
कोल्हापूरी कोवाडात
जन्मा आले रणजित
माध्यमिक शाळेतून
झाले सर्वां परिचित…! २
रणजित देसाई हे
असामान्य व्यक्तिमत्व
मान पद्मश्री लाभला
आकारीले शब्दसत्व…! ३
शेती मातीचा लेखक
सर्जनाचा केंद्र बिंदू
कथा, ललित साहित्य
प्रतिभेचा शब्दसिंधू….! ४
महाद्वार प्रसादने
लेखनास दिलें रूप
शारदीय सारस्वती
तेजाळला शब्द धूप…! ५
कमोदिनी मधुमती
मोरपंखी सावल्यात
साकारला शब्द स्वामी
कला साहित्य विश्वात…! ६
राजा रवी वर्मा,बारी
लक्ष्यवेध कादंबरी
कर्णकीर्ती राधेयने
मात केली काळावरी..! ७
खिंड पावन जाहली
रणजित शैलीतून
रामशास्त्री तानसेन
शब्द चित्र बोलीतून…! ,८
सत्य ग्रामीण जीवन
किंवा असो इतिहास
पौराणिक ढंगातून
कथा पात्र रंगे खास..! ९
पत्नी माधवी देसाई
आत्म चरीत्र गाजले
पत्नी पत्नी नात्यातले
शब्द अंतरी नाचले…! १०
नाट्य साहित्य क्षेत्रात
अध्यक्षीय बहुमान
अकादमी पुरस्कार
दिले शारदीय वाण..! ११
महाराष्ट्र गौरवात
चिरंतन आहे स्मृती
रणजित देसाई ही
स्वामी कार फलश्रृती..! १२
☆
© कविराज विजय यशवंत सातपुते
सहकारनगर नंबर दोन, दशभुजा गणपती रोड, पुणे. 411 009.
मोबाईल 8530234892/ 9371319798.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈