सुश्री तृप्ती कुलकर्णी
कवितेचा उत्सव
☆ रे घना!… ☆ सुश्री तृप्ती कुलकर्णी ☆
अश्या सोनवेळी का व्याकुळ होशी
असे काय दाटून आले घना!
इथे मोर देखील टाके उसासा
तळेही निःशब्द, मौन दाटे वना
दरवळे ना सुगंध, ना उमले कळीही
ना दवबिंदू, ना भ्रमर, काय उरले वना
का आळविशी ते सूर भैरवीचे
कुणी छेडली तार हळव्या घना !
इथे चिंब झाली वनातील वाट
सोसवेना तरूला वसंताचा थाट
एकेक वृक्ष करी पर्णत्याग
अनासक्तीने का व्यापशी घना !
अश्या सोनवेळी का व्याकुळ होशी
असे काय दाटून आले घना!
© सुश्री तृप्ती कुलकर्णी
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈