श्री तुकाराम दादा पाटील
कवितेचा उत्सव
☆ देऊन तर बघा… ☆ प्रा तुकाराम दादा पाटील ☆
नकोत आम्हाला
डोळे दिपवून टाकणा-या
झगमगत्या अनिर्बंध जहागि-या.
गडद दाटलेल्या मिट्ट काळोखाच्या
अगदी मध्यवर
एक प्रकाश पणती
सतत तेवत ठेवण्यासाठी
लागणारी टिचभराची सुरक्षित
जागा द्या
भयाण काळोखाला चिरत
जाणा-या
मंद मिणमिणत्या प्रकाश किरणांचा
मागोवा घेत तिथे जमतील
समविचारी माणसांचे थवे
शोधतील ,खोदतील, बांधतील
प्रगतीचे नवे मार्ग
माणसाला माणुसकी दाखवण्याचे
मग धरतीचे
तारांगण व्हायला कितीसा वेळ लागेल?
हळू हळू उगवतील
चंद्र सूर्य तारे
चमचमत्या प्रकाशात
नवग्रह ही येतील
आपले सगेसोयरे सोबत घेऊन
या धरतीचा स्वर्ग बनवायला
तेवढीच एक अनियंत्रित टिचभर जागा
देऊन तर बघा
© प्रा. तुकाराम दादा पाटील
मुळचा पत्ता – मु.पो. भोसे ता.मिरज जि.सांगली
सध्या राॅयल रोहाना, जुना जकातनाका वाल्हेकरवाडी रोड चिंचवड पुणे ३३
दुरध्वनी – ९०७५६३४८२४, ९८२२०१८५२६
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
खूपच छान