श्री मुबारक उमराणी
कवितेचा उत्सव
☆ अंगण!… ☆ श्री मुबारक उमराणी ☆
माझ्या अंगणाला
मेंदीचं कुंपण
माझी आई घालते
मायेचं शिंपण
अंगणात फुलते
मेंदीसंग तुळस
दारातूनच सर्वा दिसतं
विठुरायाचं कळस
सोनचाफा पिवळा
देई सुगंध
कपाळाला लावतो
भक्तभावाचा गंध
सांयकाळी बाबासंगे
म्हणतो रामरक्षा
ताई माझी सदा करे
माझी सुरक्षा
चिमणपाखराची येथे
सदा वर्दळ
कोप-यात फुलते
पिवळी, लाल कर्दळ
जाई जुई मोगरा, शेवंती
सदा फुलते
आईबाबासंगे माझ
बालमन झुलते
खारुताई उड्या मारी
माझ्यासह अंगणात
रोज नवे गाणे फुले
माझ्या मनात
मनीमाऊ पिल्यासंगे
येथे खेळते
ओवी गात माझी आई
दळण दळते
दारातच राखण करी
मोत्या माझा मित्र
दुरूनच शोभे माझ्या
अंगणाचे चित्र
कोप-यात फणस उभा
लेकराबाळासवे
आंबा चाखण्यासाठी
येती पक्ष्यांचे थवे
माझा मैतरं सांगतो
अंगण खूप सुंदर
अंध मी मनस्पर्शाने
अंगण समिंदर
खेळ दैवाचा असे
असा न्यारा
माझे अंगणच जग
असे मला प्यारा
© श्री मुबारक उमराणी
राजर्षी शाहू काॅलनी, शामरावनगर, सांगली
मो.९७६६०८१०९७.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈