सुश्री वृंदा (चित्रा) करमरकर
कवितेचा उत्सव
☆ कान्हा💦 सुश्री वृंदा (चित्रा) करमरकर ☆
नभात दाटून आला
घनची हा सावळा
तूच असशी कि
हसे श्रीहरी निळा
पसरली भवती माया
गर्द नभाच्या खाली
अंतर्बाह्य अशी का
शाल निळी पांघरली
हरी दिसला आणि
भवती जादू निळी
मुखावरी तेज विलसे
दिठी भासली निळी
करांगुलीत धरली
बासुरी अधरावरी
रंगल्या सुरावटी कि
मीच झाले बासुरी
वदनावरी नजर एकटक
हास्य मधाचे पोळे
सौंदर्याचा पुतळा हा
भवती सुगंध मळे
अंतरात आनंद अनावर
हरीच उत्सव व्हावा
अंतर्गर्भी गूढ नाद अन्,
नीलवर्ण मी ल्यावा
काय बोलू सुचेना
भूल निळी मनाला
देहभान विसरले,कान्हा
अंतर्गर्भी झिरपत गेला
© वृंदा (चित्रा) करमरकर
सांगली
मो. 9405555728
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈