श्री अशोक श्रीपाद भांबुरे
अशोक भांबुरे जी यांची कविता अभिव्यक्ती # 213
☆ चप्पल… ☆ श्री अशोक श्रीपाद भांबुरे ☆
☆
ही चप्पल पायामधली, बघ काय सांगते आहे
तू रुबाबात फिरताना, ती धूळ चाटते आहे
☆
ती झिजते तुझ्याचसाठी, तू डोंगर चढतो तेव्हा
तू कोचावर बसता ती, दारात थांबते आहे
☆
ती असता नवीन कोरी, तो पसंत करतो तिजला
मापातच असल्यानंतर, ती त्यास भावते आहे
☆
पायात घालण्यापुरती, ही किंमत आहे माझी
का उसवत गेल्यावरती, मी धाप टाकते आहे
☆
तो नवी घेऊन आला, तेव्हाच जाणले मीही
तो टाळत जातो मजला, मी त्यास टाळते आहे
☆
या माझ्या अस्तित्वाला, किंमत कुठलीही नाही
पाहून वेग मी त्याचा, वेगात चालते आहे
☆
मी कोल्हापुरची राणी, बहुमान वाटला होता
पायाची दासी झाले, तो धर्म पाळते आहे
☆
© श्री अशोक श्रीपाद भांबुरे
धनकवडी, पुणे ४११ ०४३.
मो. ८१८००४२५०६, ९८२२८८२०२८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
