सुश्री उषा जनार्दन ढगे
चित्रकाव्य
– मूक संवाद – ☆ सुश्री उषा जनार्दन ढगे ☆
☆
चालता चालता श्वास घेण्यासी
विनीत थांबले होते जराशी
उमजले माझीच मी मला
त्या धुंद मुग्ध वळणापाशी…
☆
सरसावता पुढे काळ थबकला
नकळत अलगद तो हात सुटला
कहर करूनी नभी घन गरजला
आठवणींनी ऊर भरूनी आला…
☆
चिंब आठवणींत बिंबही हलले
प्रतिरुप वलये भिजूनी गेले
अलवार स्पर्शस्मृतींत तन रोमांचले
मूक संवादे सीमित हितगुज केले..!
☆
चित्र साभार – सुश्री उषा जनार्दन ढगे
© सुश्री उषा जनार्दन ढगे
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
