श्री रवींद्र सोनावणी
कवितेचा उत्सव
☆ पैलतिरावर जाणे ☆ श्री रवींद्र सोनावणी ☆
सूर विखुरले दाही दिशांना, आता कुठले गाणे ?
तीर दिसेना ऐलतिरावर, पैलतिरावर जाणे ||धृ||
कुठे कशाचे बंध न उरले,
सुखस्वप्नांचे स्वप्नही विरले,
दिशाहीन तो फिरे कारवां, घुमवित जीवन गाणे ||१||
पर्णहीन त्या कल्पतरूवर,
धुंडीत फिरतो मधू मधुकर,
आकांक्षेच्या स्वैर वारूवर, भिरभिरतात दिवाणे ||२||
फुलपंखांनी लहरत यावी,
माळावर त्या रिमझिम व्हावी,
आणि कोरले जावे अवचित, खडकावरती लेणे ||३||
शिशिरानंतर वसंत यावा,
चैतन्याचा मयूर झुलावा,
आणि अचानक बरसत यावे, भूवर गगन तराणे ||४||
© श्री रवींद्र सोनावणी
निवास : G03, भूमिक दर्शन, गणेश मंदिर रोड, उमिया काॅम्पलेक्स, टिटवाळा पूर्व – ४२१६०५
मो. क्र.८८५०४६२९९३
≈संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
