सुश्री शोभना आगाशे
कवितेचा उत्सव
☆ निरोप… ☆ सुश्री शोभना आगाशे ☆
(गौतमबुद्ध ज्ञानप्राप्ती साठी घर सोडून गेले त्या प्रसंगावर आधारित)
☆
सखे प्रियतमे, तुला सोडुनि अज्ञात स्थळी मज आहे जाणे
प्रेमपाश गे तुझे तोडुनि, जाईन शोधित प्रकाश किरणे
*
सुखस्वप्नांच्या निद्रेमध्ये अशी अचानक थरथरसि का?
विरहवेदना भविष्यातली स्वप्नातच तू अनुभवसि का?
*
उषःकाली तू नेत्र उघडता, अजाणतेपणी मला शोधशील
सत्य क्रूर ते पडता कानी, तेच नेत्र अश्रूंनी भरतील
*
उदास नजर अन् ओठ गुलाबी, इच्छित बोलू, बोल प्रीतीचे
परंतु कांही बोलू न शकतील, जाणून घेता सत्य आजचे
*
प्रीतपाखरू उडून जाईल, लंघुनि सागर दिगंतराला
मागे सोडून सुंदर घरटे, सुखमय जरी त्या संसाराला
*
आकाशातून हाक येतसे, ज्ञानमार्गी मज प्रभू नेतसे
प्रेमपाश गे तुझे तोडुनि, जाईन जिकडून प्रकाश येतसे
☆
© सुश्री शोभना आगाशे
सांगली
दूरभाष क्र. ९८५०२२८६५८
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
