सुश्री अरूणा मुल्हेरकर
कवितेचा उत्सव
☆ ‘हवा गुलाबी…’ ☆ सुश्री अरूणा मुल्हेरकर ☆
(वृत्त~अनलज्वाला)
☆
मिठीत सखया आज तुझ्या मज राहू दे ना
थंड हवा ही कशी गुलाबी पहडू दे ना ।।१।।
☆
पुनवेची ही रात चमकते गुलाबी हवा
मोरपिसाचा स्पर्श तुझा मज वाटतो हवा ।।२।।
☆
युती पहा ही गगनामध्ये चंद्र रोहिणी
मीलन अपुले इथे मंचकी तुझी मोहिनी ।।३।।
☆
झुळझुळ करतो पहाटवारा पक्ष्यांचा रव
किरण कोवळे दिवाकराचे कुक्कुट आरव ।।४।।
☆
दाट धुक्याची चादर खुलते अवनीवरती
श्वासामध्ये तुझे नि माझे श्वास मिसळती ।।५।।
☆
शीतल वारा तनुला माझ्या किती झोंबतो
कवेत येता तुझ्या राजसा जीव हरखतो ।।६।।
☆
नकोस येऊ अरे भास्करा वरती वरती
हवा गुलाबी अशीच राहो प्राचीवरती ।।७।।
☆
दुलईमध्ये गुडुप निजाया रंगत न्यारी
सखयासंगे थंड गुलाबी पहाट प्यारी ।।८।।
☆
© सुश्री अरूणा मुल्हेरकर
डेट्राॅईट (मिशिगन) यू.एस्.ए.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
