डॉ. सोनिया कस्तुरे
चित्रकाव्य
– “अरे धाग्या ऐक ना…” – ☆ डॉ.सोनिया कस्तुरे ☆
☆
अरे धाग्या ऐक ना..
कृतज्ञ आहे रे मी तुझी
बाहेरील अग्नी घेऊन,
तू प्रज्वलित झालास….
प्रकाश देण्याची माझ्यातील क्षमता,
तुझ्यामुळेच तर फळाला आली,
मनोमन सफल झाली रे….
स्वतः जळून तू निघून जातोस, संपतोस,
मी मात्र वितळून आकारहित होते
पण टिकून राहते रे दरवेळी….
दूसऱ्या धाग्याच्या शोधात आकार घेण्यास सज्ज..
तुझ्याशिवाय माझा उपयोग तो काय..
तुझ्याविना मी अधुरी रे धाग्या..
तुझे उपकार कसे मानू
माझं पूर्णत्व तू आहेस..!
परिपूर्ण चैतन्य तू आहेस रे
माझा भोवताल प्रकाशमान होण्यासाठी..
मला उजळण्यासाठी…
☆
© डॉ.सोनिया कस्तुरे
विश्रामबाग, जि. सांगली
भ्रमणध्वनी:- 9326818354
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
