मराठी साहित्य – चित्रकाव्य ☆ बकुळी… – चित्र एक काव्ये दोन ☆ सुश्री नीलांबरी शिर्के आणि कवी : अज्ञात – प्रस्तुती : मेधा सहस्त्रबुद्धे ☆ ☆

  चित्रकाव्य  

बकुळी… – चित्र एक काव्ये दोन ☆ सुश्री नीलांबरी शिर्के आणि कवी : अज्ञात – प्रस्तुती : मेधा सहस्त्रबुद्धे ☆

सुश्री नीलांबरी शिर्के

( १ )

इवले इवले बकुळफुल

परंतु मंद गंधाचे भंडार

वळेसर बनुनी माळता

कचसंभारी अलंकार

*
प्रेमभारल्या आठवणींना

बकुळ फुलाची उपमा

दिवस कितीही लोटले तरी

गंध जाणिवाची प्रतिमा

*

काळजाच्या कुपीत जपती

मंदगंधीत आठवणींना

एकांती कुपी हळू उघडता

पुन्हः प्रत्यय येतो पुन्हा

*

 बकुळ फुलासम आठवणी 

वर्तमानी जगण्या बळ देती

हळू डोळे मिटून घेता

रिता खजिना आपुल्या पुढती

☆

© सुश्री नीलांबरी शिर्के

मो 8149144177

☆ ☆ ☆ ☆

☆ बकुळी… – ☆ सुश्री कवी : अज्ञात – प्रस्तुती : मेधा सहस्त्रबुद्धे ☆

( २ )

बकुळीच्या झाडाखाली वेचत असता फुले 

मनाच्या ओंजळीतून खूप काही सांडले 

*

वेचता वेचता फुले लहानपण आठवले

उशीर झाला म्हणून पाठीतले धपाटे आठवले

*
एक फूल माझ्याशी व्यथा मांडून गेले 

तेव्हापासून मनात त्याचे दुःख कोरले गेले

*

हल्ली मला उचलून घ्यायचे कष्ट कुणी घेत नाहीत

तसंही मला माळण्यासाठी लांब केसही उरले नाहीत

*
दोन वेण्या घातलेली परकरी नात बघता बघता गायब झाली

सर ओवत बसलेली आजीही नजरेआड गेली

*
बरं झालं तू आलीस ओंजळ तुझी भरली 

कुणीतरी आमची दखल आज घेतली

*
माहिती आहे मला माझे जीवन एका दिसाचे 

पण व्रत मात्र आमचे अव्याहत सुगंध लुटायचे

*
रोज झाडावरून ओघळून जमिनीकडे झेपावतो

तेव्हाच मनात आमच्या विचार एक येतो

*

असो जीवन एक दिवसाचे, आपण सुगंध लुटावा

प्रत्येकाच्या आयुष्याचा माझ्यापरी बकुळ व्हावा 

*

सुकून गेलो तरीही गंध मागे ठेऊन जातो

प्रत्येकाच्या हृदयात अविरत मी दरवळतो

☆ ☆ ☆ ☆

कवी : अज्ञात 

प्रस्तुती : मेधा सहस्त्रबुद्धे 

≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈