सुश्री अरुणा मुल्हेरकर
कवितेचा उत्सव
☆ जीवन गाणे… ☆ सुश्री अरुणा मुल्हेरकर ☆
(वृत्त- वनहरिणी)
☆
लय तालावर बांधियलेले सुंदर माझे जीवनगाणे
तिरकिट धा धा बोलांवर या गात राहिले मीच तराणे
*
संथ भासले कधी मला ते अवखळ निर्झर कधी वाटले
वादळ वारे साहत साहत थकले शिणले श्रांत जाहले
*
सुरावटीची एकसंधता कधीच नाही ती ढासळली
घाम गाळुनी कष्टाने मी संसाराची बूज राखली
*
ऊन सावली खेळ चालला, वर्षा आली दिला गारवा
हरित तृणांच्या गालिच्यावरी जीवनास या मिळे विसावा
*
गात्रे थकली तेज हरपले, तार छेडते परि मी आहे
रंग भानुचा तांबुस पिवळा मावळतीला खुलतो आहे
☆
© सुश्री अरुणा मुल्हेरकर
डेट्राॅईट (मिशिगन) यू.एस्.ए.
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
