डॉ.सोनिया कस्तुरे
कवितेचा उत्सव
☆ सखे… 
डॉ.सोनिया कस्तुरे ☆
सावित्री होऊया ग सखे
माणूस होऊया..!
तुझा धर्म, माझा धर्म
तुझी जात, माझी जात
माझी देवता, तुझी श्रध्दा
घरात ठेवूया..!
सावित्री होऊया ग सखे
माणूस होऊया..!
तुझी साडी, माझी माडी
दाग-दागिने, कपडे भरजरी,
पैसे असतील खूप तिजोरी
घरात ठेवू श्रीमंती सारी
सावित्री होऊया ग सखे
माणूस होऊया..!
तू गृहीणी, माझी नोकरी
तुझा पक्ष, सत्ता शिरजोरी
द्वेष, मत्सर, व्यंगावर मस्करी
चर्चा यावर नकोच करुया..!
सावित्री होऊया ग सखे
माणूस होऊया..!
माझा गंध, तुझा रंग
सौदर्याचे विपरीत तरंग
विविध लोभी अंतरंग
नकली रुप सोंग-ढोंग
सोडून देऊया..!
सावित्री होऊया ग सखे
माणूस होऊया..!
तुझी माझी स्पर्धा कुणाशी ?
एकोप्याने सुंदर जगण्याशी
तिच्या मदतीला तिने धावण्याची
स्त्रीत्वातील माणूस जपण्याशी
ध्यानात ठेवूया..!
सावित्री होऊया ग सखे
माणूस होऊया..!
क्षुद्र म्हणून तू-मी हिणलो
सावित्रीजोतीमुळे शिकलो सवरलो
आता कुठे भानावर आलो
निखळ जगणं अनुभवूया..!
सावित्री होऊया ग सखे
माणूस होऊया..!
तुझ्या माझ्यात द्वेष पसरेल
नफा त्याचा व्यवस्था उठवेल
व्यवस्था मग गुलाम बनवेल
स्वातंत्र्याचे मोल समजून
संघटीत राहूया..!
सावित्री होऊया ग सखे
माणूस होऊया..!
© डॉ.सोनिया कस्तुरे
विश्रामबाग, जि. सांगली
भ्रमणध्वनी:- 9326818354
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
