सौ.उज्वला सुहास सहस्त्रबुद्धे
कवितेचा उत्सव
☆ काव्य -घरटे ☆ सौ.उज्वला सुहास सहस्त्रबुद्धे ☆
काव्य घरटे बांधत होते,
मनी शब्दांचे पक्षी!
घेऊन आले विचार काड्या,
बांधून केली नक्षी !
भावनांचा थवा आला,
जणू रेशीम कापूस शेवरी!
गुंफण त्याची काव्यात करता,
घरटे बनते सुबक परी!
एखादी सुगरण असते ,
करते ती कशिदाकारी!
बनतो कवितेचा खोपा सुंदर,
देखणा दिसतो बाहेरी !
एक असते चिमणीवाणी,
घरटे बनते तिचेही भारी !
कुवत तिची जरी इवली इवली,
शब्दघरटे बनवीते न्यारी !
शब्दपक्षी हे भिरभिर फिरती,
प्रत्येकाची अलग तऱ्हा!
कधी भरारी गरुडासम घेती!
तर कधी बिलगती धरा!
शब्द पक्षांची जैसी कुवत,
तसेच बनते शब्दांचे घरटे!
शब्द घरटे ते बांधत जाता,
अधिक अधिकच सुंदर बनते!
© सौ. उज्वला सुहास सहस्रबुद्धे
≈संपादक – श्री हेमन्त बावनकर/सम्पादक मंडळ (मराठी) – सौ. उज्ज्वला केळकर/श्री सुहास रघुनाथ पंडित /सौ. मंजुषा मुळे/सौ. गौरी गाडेकर≈
