मराठी साहित्य – कवितेचा उत्सव ☆ फराळाचे संमेलन… ☆ सौ.रोहिणी अमोल पराडकर ☆

कवितेचा उत्सव 

☆ फराळाचे संमेलन ☆ सौ.रोहिणी अमोल पराडकर ☆

(काव्यप्रकार – अष्टाक्षरी काव्य)

सभा भरली डब्यांची

फराळाचे संमेलन

गुजगोष्टी कानी सारी

करा नियम पालन

सांगा आता पटकन

कशी झाली हो दिवाळी

शोभे इस्पिक ची राणी

पहा ती शंकरपाळी

गोल गोल चकलीच्या

मारी चार पाच वेढा

रागावला तो चिवडा

आला धावत तो पेढा

करंजीच्या नावेतून

सारे बसुनी फिरती

करी शेवयाची काठी

लाडू ते गडगडती

लोक नाके मुरडती

म्हणे दिवाळी संपली

व्यथा पदार्थ मांडती

सभा बरखास्त झाली

© सौ. रोहिणी अमोल पराडकर

कोल्हापूर  

भ्रमणध्वनी – 9767725552