सुश्री अरुणा मुल्हेरकर
कवितेचा उत्सव
☆ वैशाख स्वागत… ☆ सुश्री अरुणा मुल्हेरकर ☆
☆
स्वागत करुया वैशाखाचे
झळा मारती तप्त रवीच्या
घरात बसुनी पंख्याखाली
चला मांडुया डाव रमीचा
*
सुरू जाहली सुटी मुलांना
वह्या पुस्तके ओझे नाही
डाळ पन्ह्याची रुची चाखुया
आंब्यासम फळ दुसरे नाही
*
अंगांगाची होत काहिली
निसर्ग आहे पण नटलेला
पीत बहावा फुलला आहे
गुलमोहर तो बहारलेला
*
वैशाखी दिन विशेष तृतिया
मुहूर्त मोठा अक्षय्य नामे
शुभकार्यासी योग्य म्हणुनिया
सरसर करुया मंगल कामे
*
जमू लागती मेघ नभी का
वैशाखाच्या या वणव्याने
जलद सावळे अवलोकुनिया
गाऊ नाचू उल्हासाने
☆
© सुश्री अरुणा मुल्हेरकर
डेट्राॅईट (मिशिगन) यू.एस्.ए.
≈ ब्लॉग संपादक – श्री हेमन्त बावनकर/सम्पादक मंडळ (मराठी) – श्रीमती उज्ज्वला केळकर/श्री सुहास रघुनाथ पंडित ≈
